ஒருநாள் போட்டிகள் மற்றும் டி20 போட்டிகளுக்கு உலகக்கோப்பை இருப்பதைப் போல பாரம்பரியம் மிக்க டெஸ்ட் போட்டிகளுக்கும் உலகக்கோப்பை இருக்க வேண்டும் எனும் நோக்கத்தில் இந்த சாம்பியன்ஷிப் போட்டி நடத்தப்படுகிறது.
சர்வதேச கிரிக்கெட் கவுன்சிலின் டெஸ்ட் போட்டிகளுக்கான தரவரிசையில் மட்டுமல்லாது, டெஸ்ட் சாம்பியன்ஷிப் தரவரிசையிலும் இந்தியா முதலிடத்தில் உள்ளது. இதில் நியூசிலாந்து ஆறாம் இடத்தில் உள்ளது.
2019 - 2021 காலகட்டத்தில் ஒன்பது டெஸ்ட் அணிகள் தலா ஆறு டெஸ்ட் தொடர்களில் விளையாடும். அதில் அதிகம் தொடர்களில் வெல்லும் அணிகள் இறுதியில் மோதும்.
தனிப்பட்ட போட்டிகளில் பெறும் வெற்றிகளை அல்லாமல் தொடர்களில் பெறும் வெற்றிகளின் அடைப்படையிலேயே டெஸ்ட் சாம்பியன்ஷிப் தரவரிசை நிர்ணயிக்கப்படுகிறது என்பதால், இந்த டெஸ்ட் தொடரில் வெல்வது தனது முதலிடத்தை தக்க வைத்துக்கொள்ள இந்திய அணிக்கு மிகவும் முக்கியமானதாகும்.
குறைவான டெஸ்ட் போட்டிகளில் விளையாடும் அணிகள் பாதிக்க கூடாது என்பதால், டெஸ்ட் போட்டிகளின் எண்ணிக்கை கணக்கில் எடுத்துக்கொள்ளப்படாமல், டெஸ்ட் தொடர்களின் எண்ணிக்கை கணக்கில் கொள்ளப்படுகிறது.
ஒரு தொடரில் இரண்டு முதல் ஐந்து போட்டிகள் இருக்கும்.
ஆறாம் இடத்தில் உள்ள நியூசிலாந்து தரவரிசையில் முன்னேற இந்தியாவை வென்றாக வேண்டிய கட்டாயத்தில் உள்ளது.
